AFL Vanuatu bae hemi sendem long yia ia, fesfala pleya blong AFL long Vanuatu blong olgeta senia tim blong ol gel, we bae hemi ko trael long Australia long manis ia.
AFL Vanuatu hemi wok tugeta wetem AFL Australia, tru long outreach prokram blong olgeta we i kam long Vanuatu long las yia, taem ia nao oli lukluk long olgeta senia gel we bae oli ko long trial long Australia.
Jesta Toka nao oli bin selektem hem aut long olgeta senia tim blong ol gel, blong ko long trial. AFL Australia nao hem i selektem Toka blong ko long trial ia, folem olgeta skills mo komitmen blong hem long olgeta training mo prokram we AFL hemi stap ranem.
Toka hem i kat 21 yia, hemi wan student blong USP long Vila mo hemi plei wetem tim blong Freshwota mo long semtaem tu hemi kapten blong tim ia.
“Sport hemi no niu long mi,mi bin play fulap sport finis. Mi jes joinem AFL long las yia nomo, afta oli selektem mi blong ko long trael,” Toka i talem.
Toka hemi kontiniu tu blong talem se: “Aim blong mi long trael ia hemi blong winim trael blong mi mo blong kat wan gutfala opotunity,mo mi wantem enkarejem everi yangfala gel mo boy long AFL Vanuatu,blong save impruvum olgeta skills mo tekniks blong olgeta. I no hemia nomo, be mesej blong mi i stp ko long ol gel mo boy we oli stap nomo long haus i no kat samting blong mekem, kam traem niufala sport ia — AFL from we hemi wan popular sport raon long wol.”
Daily Sports hem i toktok tu wetem AFL Vanuatu Programe Manager, Nancy Patterson,hemi talem se,every pepa wok olaem passport mo visa blong Toka hemi rere finis, mo hemi sapos blong flae long namba 5 blong manis March ia, be oli stap wet nomo long AFL Australia blong konfemem deit we bae hemi ko.
“Toka hemi spell ia long skul, mekem se bae hemi ko long trael ia,sapos bae hemi winim trael blong hem,bae hemi save kat wan gutfala privilidj blong save karem wan skolaship,mo continue long study blong hem long ovasi. AFL Vanuatu hemi kivim ful saport blong hem i ko long Toka olsem we hemi fesfala Vanuatu female player we bae hemi ko long trael wetem wan tim blong saot Sydney,” Patterson hemi talem.
Long nara nius, AFL Vanuatu bae hemi kikoff long manis Maj kasem Mei wetem olgeta prokram blong olgeta. Sapos eni pikinini i interes, pikimap fom long Vanuatu Spirit, oposet Grand Hotel, olgeta registration fom hemi Vt2,500 long eni eij krup. Trening mo program blong olgeta pikinini bae hemi stap long Holiday inn Resort fil, opposet Rowing klab.