violence-against-women

Ol woman mo pikinini wea hemi stap facem famli vaelens, ol problem hemi save kam moa bigwan long taem blong COVID-19. Long Vanuatu, yumi stap long wan State of Emergency, wea ol pikini hemi no stap long skul mo fulap man mo woman hemi lusum job blong olgeta. Yumi mas tingbaot tu hao nao COVID-19 i afektem ol viktim blong famli vaelens.

 

Yumi long Vanuatu, yumi stap fesem wan bigfala jalenj tru wetem niufala virus ia COVID 19 we i stap long fulap kaontri raon long wol finis. Fulap long yumi, yumi fraet mo yumi no sua se fiuja blong yumi bae i luk olsem wanem. Yumi no wantem nating blong sik ia i kasem yumi –sapos i kam bigwan long ples ia, ol klinik mo hospital bae oli faenem i had blong dil wetem fulap kes. I gud se Gavman hemi stap tekem aksen eli – bifo we i gat eni confirmed kes long Vanuatu.

 

Be even sapos sik ia i no kasem yumi, laef blong plante blong yumi bae hemi kam moa had. Naya we yumi klosem evri border blong yumi – i nomo gat tourist – mo i mas olsem. Be fulap man mo woman oli lusum wok blong olgeta finis mo fulap moa yet maet bae oli fesem sem samting. Klosap evri resort mo hotel oli klos finis – ol restaurant tu naya fulap oli klos mo wetem State of Emergency ova long nekis tu wik, ol take away nomo oli save open i stap. Insaed long wan sot taem nomo, plante man mo woman naya oli nomo gat mani blong kakai, blong rent, blong skul fee blong ol pikinini. Yumi nogat kaen sapot blong olgeta we oli no wok we sam narafala kaontri oli gat. Yumi no save se bae i olsem blong hamas manis stret – for sure bae hemi tekem taem blong wol i save winim sik ia, mo even sapos we threat blong virus i lus, evri economy raon long wol bae oli suffer bigwan, mo maet bae i tekem long taem blong ol turis mo ol resident we oli aot blong kambak….

I minim se bae ol samting oli kam had. Mo long ol kaen taem olsem, i gat wan grup we bae oli fesem wan had taem mo bitim eni narawan. Hemi olgeta we oli stap fesem famli vaelens insaed long ol hom blong olgeta. Long taem blong disasta yumi save se ol problem ia oli save kam bigwan – mo yumi luk finis se ol problem ia oli stap kam andap long ol narafala kaontri long taem ia. Taem man i lusum wok, taem famli i nogat mani, taem yumi stress mo wari bigwan, plante man oli save tekem aot kros ia long ol famli blong olgeta. Mo i kam moa had blong aksesem ol sevis we oli save helpem ol viktim blong famli vaelens from ol sevis ia oli nogat bigfala risoses.

Famli vaelens hemi wan bigfala problem long Vanuatu finis. Be yumi mas andastanem se hemi gat bigfala posibilit se bae i kam moa wos yet long kaen taem olsem mo yumi mas redi blong sapotem ol viktim we bae oli nidim help. Taem yumi stap talem long ol sitisen se yumi no mas wokbaot – yumi mas stap long haos nomo; taem yumi save se fulap bae oli fesem problem blong mani; yumi nid blong luksave se bae plante woman mo pikinini (we olgeta nao oli fesem vaelens moa bitim ol man) bae oli fas long haos wetem ol man we oli save yusum vaelens agensem olgeta.

Insaed long ol aweness we Gavman hemi stap mekem, yumi mas inkludem tu aweness long saed blong famli vaelens. Naya hemi wan impoten taem blong ol man mo woman oli mas save se famli vaelens hemi agensem loa blong Vanuatu. Yumi no gat raet blong yusum eni kaen vaelens agensem wan famli memba. Yu no save kilim, whippim o faetem woman blong yu o pikinini blong yu. Yu no save yusum ol rabis toktok blong daonem wan famli blong yu. Yu no save mekem eni fasin blong seksual vaelens agensem wan famli memba blong yu.

Yumi mas letem ol viktim blong vaelens oli save se, no mata se hemi wan taem blong disasta, be still ol sevis oli stap blong helpem olgeta. Vanuatu Women’s Senta hemi open i stap – ol opening hours blong olgeta oli jenis – naya oli open kasem 12:30 nomo evri dei, be oli still gat 24 haoa emergency laen we hemi 24000. Majistret kot hemi still open blong tekem ol aplikesen blong ol famli proteksen oda we i save help blong protektem wan viktim. Ol polis oli still stap blong mekem wok blong olgeta blong protektem ol viktim blong famli vaelens.

Mo yumi mas tingbaot tu hao nao disasta ia i afektem ol viktim blong famli vaelens – olsem sapos we wan viktim hemi lusum wok blong hem, bae i moa had blong hemi lego wan man o woman we i stap yusum vaelens agensem hem. O sapos we hemi mas stap nomo long haos from sik i kam long yumi, hao nao bae hemi save aksesem ol sevis blong helpem hem?

Bigfala focus blong yumi evriwan naya hemi long sik ia, mo yumi evriwan yumi wari long fiuja blong kaontri. Be sapos yumi no tingbaot tu ol isiu blong famli vaelens naya, bae yumi no mekem wok blong yumi blong traem blong protektem olgeta we oli stap long bigfala denja bitim yumi evriwan.


By Anonymous